▪️ केंद्रीय मंत्री नितीन गडकरी आणि मुख्यमंत्री देवेंद्र फडणवीस यांची प्रमुख उपस्थिती
नागपूर समाचार : विदर्भाच्‍या मेगा इंडस्ट्रियल एक्स्पो, बिझनेस कॉन्क्लेव्ह आणि इन्व्हेस्टमेंट समिट ‘अ‍ॅडव्हान्टेज विदर्भ २०२५ – खासदार औद्योगिक महोत्सव’ चे शुक्रवार, ७ फेब्रुवारी २०२५ रोजी सकाळी १०:३० वाजता केंद्रीय रस्ते वाहतूक आणि महामार्ग मंत्री मा. श्री. नितीन गडकरी आणि महाराष्ट्राचे मुख्यमंत्री मा. श्री. देवेंद्र फडणवीस यांच्या हस्ते उद्घाटन होत आहे.
केंद्रीय मंत्री आणि मुख्य संरक्षक नितीन गडकरी यांच्या संकल्‍पेनतून साकारलेल्‍या व असोसिएशन फॉर इंडस्ट्रियल डेव्हलपमेंट (एआयडी) द्वारे आयोजित अॅडव्हांटेज विदर्भ 2025 राष्‍ट्रसंत तुकडोजी महाराज नागपूर विद्यापीठ परिसर, अंबाझरी मार्ग, नागपूर येथे 7 ते 9 फेब्रुवारी दरम्‍यान आयोजित करण्‍यात आला आहे.
उद्घाटन सत्राला महसूल मंत्री आणि नागपूरचे पालकमंत्री मा. श्री. चंद्रशेखर बावनकुळे; उद्योग मंत्री मा. श्री. उदय सामंत, केंद्रीय संरक्षण राज्यमंत्री संजय सेठ यांची विशेष उपस्थिती राहणार आहे. सोबतच, सज्जन जिंदाल, बालसुब्रह्मण्यम प्रभाकरन, रोशनी नादर मल्होत्रा आणि जीबीएस राजू, अतुल गोयल सारखे प्रसिद्ध उद्योगपती तसेच, अॅड. आशिष शेलार, अतुल सावे, संजय राठोड, डॉ. अशोक उईके, संजय सावकारे, अॅड. आशिष जयस्वाल, पंकज भोयर आणि इंद्रनील नाईक हे नेते उपस्थित राहतील.
मेगा इंडस्ट्रियल एक्स्पो
या औद्योगिक प्रदर्शनात विविध उत्पादने आणि बहु-क्षेत्रीय उद्योगांचे ३०० हून अधिक स्टॉल राहणार आहेत. त्‍यापैकी १०० स्टॉल सूक्ष्म आणि लघु उद्योगांसाठी राखीव ठेवण्‍यात आले आहेत. इतर स्टॉलमध्ये संरक्षण सार्वजनिक उपक्रम, स्टील आणि खाण मंत्रालय, भारतीय विमानतळ प्राधिकरण, सेबी, केंद्रीय प्रत्यक्ष कर मंडळ, जीएसटी विभाग, पोस्ट विभाग, सरकारी ई-मार्केटप्लेस (जीईएम), शैक्षणिक संस्था यासारख्या सरकारी विभागांमधील विविध क्षेत्रातील उत्पादन श्रेणी, यंत्रसामग्री आणि सेवा प्रदर्शित केल्या जातील.
सेमिनार आणि तांत्रिक सत्र
या कार्यक्रमात स्टील, संरक्षण, विमान वाहतूक, बांबू, दुग्धव्यवसाय, शिक्षण, आयटी आणि आयटीईएस, लॉजिस्टिक्स, स्टार्टअप्स, फार्मास्युटिकल्स, अक्षय ऊर्जा, पर्यटन, वस्त्रोद्योग, रत्ने आणि दागिने, स्टार्टअप इकोसिस्टम एंगेजमेंट यासह विविध क्षेत्रांमध्ये व्यवसाय चर्चासत्रे आणि तांत्रिक चर्चा आयोजित केल्या जातील. स्टार्टअप क्षेत्रातील युनिकॉर्न संस्थापक अखिल गुप्ता, संस्थापक, NoBroker.com, विभव कपूर, सह-संस्थापक, प्रिस्टाईन पॉलिसीबाजारचे अध्यक्ष आणि सीईओ सर्ववीर सिंग आणि अपना चे निर्मित यांचा सहभाग राहील. तसेच, युनिकॉर्न व्हेंचर्सचे अनिल जोशी, गुगल स्ट्रॅटअपचे अपूर्व चामरिया, हेलिकॉप्टर मॅन प्रदीप शिवाजी मोहिते, एअर व्हाइस मार्शल सूर्यकांत चाफेकर, लेफ्टनंट जनरल संजय वर्मा, मेजर जनरल अनिल बाम, एआयसीटीई दिल्लीचे डॉ. अभय जेरे, टीसीएसचे अरविन कुमार, नौकरी डॉट कॉमचे रोहित दमानी हे देखील विविध सत्रांमध्ये सहभागी होतील.
मेगा पेटंट गॅलरी
अ‍ॅडव्हान्टेज विदर्भ मध्‍ये पहिल्यांदाच पेटंट गॅलरी प्रदर्शित केली जात आहे. यात पर्यावरण/सामाजिक प्रभाव, कोअर इंडस्‍ट्री, केमिकल, हेल्‍थ टेक्‍नॉलॉजी, बायोटेक, अ‍ॅग्रोटेक, आयओटी/रोबोटिक्स/एआय आणि फिनटेक या श्रेणींतील एकुण 41 पेटंटचा समावेश राहणार आहे. विद्यार्थी व्यावसायिकीकरण आणि इन्‍क्‍युबेशसाठी तयार असलेले हे आपले नवोपक्रम प्रोटोटाईप येथे प्रदर्शित करतील.
विशेष आकर्षणे
यावेळी, आंतरराष्ट्रीय कीर्ती प्राप्‍त डॉली चायवाला यांची उपस्थिती प्रदर्शनात आकर्षणाचे केंद्र असेल. याशिवाय विविध फूड कोर्ट, मनोरंजनासाठी गेमिंग आणि ई-गेमिंग झोन, फॅशन शो, बँड स्पर्धा यांनाही एक्स्पोमध्ये स्थान देण्यात आले आहे. भारत मोबिलिटी येथे लाँच केलेली दुचाकी आणि चारचाकी ई-वाहने देखील प्रदर्शनाचे आकर्षण असणार आहेत.
९ फेब्रुवारी रोजी समारोप
९ फेब्रुवारी रोजी सायंकाळी ५:०० वाजता होणाऱ्या समारोप समारंभाला केंद्रीय वाणिज्य मंत्री माननीय पीयूष गोयल, मुख्य संरक्षक नितीन गडकरी, मुख्यमंत्री देवेंद्र फडणवीस, पालकमंत्री चंद्रशेखर बावनकुळे, प्रफुल्ल पटेल, संजय राठोड, अॅड. आशिष जयस्वाल, पंकज भोयर आणि इंद्रनील नाईक यांची उपस्थित राहणार आहे.
आयोजन समितीचे अध्यक्ष अजय संचेती आणि अॅडव्हांटेज विदर्भची टीम, असोसिएशन फॉर इंडस्ट्रियल डेव्हलपमेंटचे अध्यक्ष आशिष काळे, सचिव डॉ. विजय कुमार शर्मा, उपाध्यक्ष गिरधारी मंत्री आणि प्रणव शर्मा, कोषाध्यक्ष प्रा. राजेश बागडी आणि कार्यकारी समितीने उद्योजक, व्यावसायिक, उद्योगातील भागधारक, विद्यार्थ्यांना मोठ्या संख्येने सहभागी होऊन हा उपक्रम यशस्वी करण्याचे आवाहन केले आहे.
